Иргэний хэргийн шүүхийн шүүгчдэд зориулсан Иргэний эрх зүйн намрын ээлжийн сургалт 2018 оны 10 дугаар сарын 03-13-ны өдөр 3 ээлжээр болно. Тус сургалтын IV ээлж Шүүхийн сургалтын "Баяндөхөм төв”-д өчигдөр эхэллээ.
Энэ жилийн сургалтыг "Хөрөнгө шилжүүлэх гэрээний эрх зүйн маргаан” сэдвийн хүрээнд зохион байгуулж байгаа бөгөөд бусдын эзэмшил, ашиглалтад хөрөнгө шилжүүлэхтэй холбоотой гэрээний Иргэний хуулийн хэрэглээ, түүнийг тайлбарлан хэрэглэх онол арга зүйн мэдлэгийг нэмэгдүүлэх, шүүхийн шийдвэр боловсруулах ур чадварыг дээшлүүлэх зорилготой юм.
Сургалтыг эд хөрөнгө хөлслөх, орон сууц хөлслөх, санхүүгийн түрээс /лизинг/ түрээсийн гэрээ, хөдөө аж ахуйн зориулалттай газрын түрээсийн гэрээ, франчайз, мерчендайзийн гэрээ, эд хөрөнгө үнэ төлбөргүй ашиглах гэрээтэй холбоотой маргаан, түүнийг шийдвэрлэж буй шүүхийн практик зэрэг сэдвүүдээр Иргэний эрх зүйн сургагч багш нар болох Улсын дээд шүүх, Иргэний хэргийн давж заалдах шатны шүүх болон анхан шатны шүүхийн шүүгч-багш нар удирдан явуулж байна.
Сургалтын IV ээлжийг Шүүхийн судалгаа, мэдээлэл, сургалтын хүрээлэнгийн захирал Ц.Мандах нээж хэлсэн үгэндээ Шүүхийн ерөнхий зөвлөлөөс өнгөрсөн хугацаанд иргэний хэргийн шүүхийн шүүгчид зориулан зохион байгуулсан хууль хэрэглээний сургалтуудын агуулга, сургалтыг вакумжсан орчинд зохион байгуулахын ач холбогдлыг онцлон энэ жилийн сургалтын сэдвийг сонгосон үндэслэл, шалтгаан, сургагч багш нарын бэлтгэсэн гарын авлага зэргийг танилцуулсан юм.
Энэхүү сургалтыг уламжлал ёсоор Шүүхийн ерөнхий зөвлөл, Улсын дээд шүүхийн Иргэний хэргийн танхим, Германы Олон Улсын Хамтын Ажиллагааны Нийгэмлэгийн "Эдийн засгийн тогтвортой хөгжлийн эрх зүйн орчныг баталгаажуулах төсөл”-тэй хамтран жил бүр зохион байгуулж байгаа бөгөөд хавар, намрын улиралд хуваан оролцуулж байгаагаараа онцлог юм. Хаврын ээлж буюу I-III ээлжид 105 шүүгч оролцсон бөгөөд намрын буюу IV-VI ээлжид 140 шүүгч оролцох юм.
Шүүхийн судалгаа, мэдээлэл, сургалтын хүрээлэн