Шүүхийн захиргааны байгууллагын удирдах ажилтны хэлэлцүүлэг өнөөдөр (2024.01.19) Шүүхийн ерөнхий зөвлөлийн байранд боллоо. Анхан болон давж заалдах шатны шүүхийн тамгын газрын шилдэг бүтээл, тэргүүн туршлагыг түгээн дэлгэрүүлэх, өөрчлөлт шинэчлэлтийг манлайлан удирдах арга барилыг дээшлүүлэх, өөрийгөө илэрхийлэх арга зүйг сайжруулах зорилгын дор 2023 оны ажлаа дүгнэж, энэ жилийн төлөвлөгөөгөө хэлэлцэв.
Хэлэлцүүлэгт Шүүхийн ерөнхий зөвлөлийн дарга, гишүүд, Гүйцэтгэх нарийн бичгийн дарга, ажлын албаны нэгжийн дарга нар, анхан болон давж заалдах шатны шүүхийн Тамгын газрын дарга нар, Шүүхийн сахилгын хорооны Ажлын албаны дарга, Эвлэрүүлэн зуучлагчдын зөвлөлийн дарга Авлигатай тэмцэх газар, Урьдчилсан сэргийлэх, соён гэгээрүүлэх хэлтсийн ажилтан оролцлоо.
Шүүхийн тамгын газруудаас 2023 онд үйл ажиллагааны үр дүн, менежментийн ур чадвараараа тэргүүлэгчдийг тодруулав.
"Шилдэг менежменттэй Тамгын газар”-аар Говь-Алтай аймаг дахь шүүхийн Тамгын газар ШЕЗ-ийн Дотоод аудитын хяналт-шинжилгээ, үнэлгээний дүн, гүйцэтгэлийн төлөвлөгөөний биелэлтийн үнэлгээ, үүрэг даалгаврын хэрэгжилт, шүүхээр үйлчлүүлсэн иргэдийн үнэлгээ, тухайн шүүхийн шүүгчдийн зөвлөгөөнөөс ирүүлсэн үнэлгээ зэрэг шалгуур үзүүлэлтээр тэргүүлэн, шалгарсан юм.
"Шилдэг инновац нэвтрүүлсэн Тамгын газар”-аар "Хөгжлийн бэрхшээлтэй иргэнд зориулсан Тусламжийн цонх” ажлыг хэрэгжүүлсэн Сонгинохайрхан дүүргийн иргэний хэргийн анхан шатны шүүхийн Тамгын газар, "Шилдэг ажил хэрэгжүүлсэн Тамгын газар”-аар "Дотоод удирдлага хяналтын систем” ажлыг хэрэгжүүлсэн Завхан аймаг дахь шүүхийн Тамгын газар тус тус шалгарлаа.
Хэвлэл мэдээллийн хэлтэс